بوقالات شعبية جزائرية

فالبوقالة من التقاليد العريقة في العاصمة الجزائرية

حيث كان النسوة يتفنن في ابتكار الحكم

" على الطريقة الجزائرية "اليكم البعض منها :

** في يدي القمح لمسبل و مليت حجري ترفاس اوسعدي الزين المدلل تاجي فوق الراس على عهدي ما نتبدل كي تدور قاع الناس.

** الفحالة عندها حدت و القباحة عندها وصلت

** انت ساعة و انا رقاص فيك انت خاتم و انا مرجان فيك نطلعو لراس الجبل و الي تلحق بكري تديك .

** يا المزوق من البرى وش حالك من الداخل

** اعطاك الزين و طباعك الحنة كحل العين واتاك .. و ردة في الجنينة في يد اللي حذاك يحفضك ربي من لعوينة ويخليلك الي بغاك .

** غرست و ردة في محبس كبرت و دارت الشوك و اش اداني نمسها حتى و ليت مهلوك .

** شعري كحل و عينيا شهل .. فيا ليل و نهار و ما تمل قلتلو يا جميل يا ولد فلان اذا عينك فيا ارواح خبر والديا

** علاش قالو العين الكحلة ما تفناش قلتلهم اللى نحبها مازال ماجاتش

** ليل كامل وانا عند باب دارهم انوح حشمتك ياسيدي عيسى وياسيدى نوح اعطوني بنتكم وخليني نروح

** الناس تنده بالرجال و الوالي … انا ننده بربي العالي .. اذا حبيتوا ديروا بحالي

** حبيبك حبوا و السر اللي بيناتكم خبيه .. و اذا حبك حبو اكثر و اكثر اذا نساك لا تسال عليه …

** طلعت للجنان وفرشت زربية لبست القطيفة وغطيت رجليا ودرت قرطاس ذهب حتى لوذنيا افرحي يا حبيبي ولى ليا نستشفى فى العدو كيما استشفى فيا

** انتيا نجمة ضوات ليلا من تحت السحاب تلالا كي شفتك وحدت الله ما خلق يا مولايا قلتلك تحبني قلتي لا لا

** شفت ثلاث بنات في وسط الدار الأولى قالت زهري محبوب و الثانية قالت زهري مكتوب و الثالثة جميلة قالت زهري مع المحبوب انا خيرت دعوة الخير تشفع فيا و تنحيلي الذنوب

** على النبي صليت و على صاحبوا رضيت .. و عيطت يا خالقي يا مغيث كل مغياث .. يا خالق كل شيء دايراتك مفتاح كل خير.. ديرلي يا ربي في الدنيا خير

** انت خمرية والناس تشوف فيك زهوانية وانت فى روحك برانية وتقولي نبغي اللي ليحوس بيا

** قلبي في نار الغرام مكوي .. يا يما شوفي ما صر بيا ذاك الزين اسلبني الحاجب و العين راني شادة فيه ليوم الدين

** قولو اللي ذاق صبرو يشد في حبال الرجاء و علاش يتنكد ياك ربي العالي ما يضيع حد .

** رونت الحنة بالزهر و المسك و العنب بخور ولقيت كفي للتمر و خرجت البدر ادور..اقعد و استقيم الزهور اللي كانت تحت البحور

** ماني طبسى نتكسر ماني وردة تذبال راني خاتم دهب ولويزة في يد سيد الرجال

** فاطمة ياكحلة العيون وين ما تكوني نرسك مرسول آدا سكنتي البحر نرسك عوامة وأدا أنت في السما نرسك حمامة وأنت شابة ما نديك غير إنا

** يا مولاة ذاك الجنان عينيك و حواجبك نيلة قلبي حصل عندك و ماصبتلوا حيلة.

** هبطت البحر و صبت ثلاث خطاب واحد فارس الفرسان و الثانى كاشف الأحلام يتمتاك ترحلي معاه.

** غرست شجرة الرمان واسقينها حتى نورت وجابت الثمار وادعيت ربى إنشاء الله يجمعني بالحبيب في وسط النهار.

** إذا داركم بالسلوم نطلعها و إذا بنتكم حجبانة نعطيكم لوامحها و إذا عذبتونى روحو شوفو خاتمي في صبعها.

** قلبي معمر ودمى سابل أنت حبيبي مرة تغرب ومرة تشرق شكي تلك للعالي وإذا اكتبتلى تكون حلالي

** يانجمة النجوم راكى ضاوية في السماء ورايح يجى وليد الحلال اللي يخرجك من لهموم ويسقيك بالماء.

** نسول عليك يا لحبيب والسوال خير من ألف هدية ساعة على ساعة نتفكر الزمان و نقول إنشاء الله يعيا ويولى ليا.