السلام عليكم و رحمة الله و بركاته
الموضوع واضح من عنوانه
و هو موسوعة نحاول فيها تجميع أكبر قدر ممكن من البوقالات
بهذا نكون قد حافظنا و لو قليلاً على موروثنا الشعبي الذي سيزول و يندثر مع مرور الزمن و خصوصاً مع زمن التكنولوجيا و الأنترنات التي غلبت على مجمل اهتماماتنا
فلما لا نسخر هذه التكنولوجيا في خدمة تراثنا الشعبي؟
ربما نكون بهذا الموضوع قد ساهمنا في ترسيخ سطر ما، جملة ما، عبارة ما، كلمة ما …
فأرجو أن تجد الفكرة طريقها إلى التجسيد الفعلي
سأبدأ بأول " فال " كفاتحة للموضوع و هي بوقالة نويتها على إنسان عزيز عليّ و غالي هو بمثابة والدي، في هذه الأثناء هو في المستشفى و سيخضع غداً إن شاء الله لإجراء عملية جراحية، أتمنى له الشفاء العاجل و العودة السريعة إلى بيته و عائلته
باسم الله بديت وعلى النبي صليت وعلى الصحابة رضيت وعيّطت يا خالقي يا مغيث كل مغيث يا رب السماء العالي:
خرجت نهار الجمعة، في يدي شمعة، قالولي أمسحي ذيك الدمعة، و انساي الخلعة، قريب يتلموا احبابك و صحابك و يفرحوا معاك الجماعة .
إن شاء الله يرجع عمي بصحة و سلامة يا رب للبيت و تتلم من حوله كل العائلة من جديد و نفرحو كلنا بيه و معاه
الآن أنا في انتظار مشاركاتكم
اقتباس 
|
السلام عليكم و رحمة الله و بركاته الموضوع واضح من عنوانه و هو موسوعة نحاول فيها تجميع أكبر قدر ممكن من البوقالات بهذا نكون قد حافظنا و لو قليلاً على موروثنا الشعبي الذي سيزول و يندثر مع مرور الزمن و خصوصاً مع زمن التكنولوجيا و الأنترنات التي غلبت على مجمل اهتماماتنا فلما لا نسخر هذه التكنولوجيا في خدمة تراثنا الشعبي؟ ربما نكون بهذا الموضوع قد ساهمنا في ترسيخ سطر ما، جملة ما، عبارة ما، كلمة ما … فأرجو أن تجد الفكرة طريقها إلى التجسيد الفعلي سأبدأ بأول " فال " كفاتحة للموضوع و هي بوقالة نويتها على إنسان عزيز عليّ و غالي هو بمثابة والدي، في هذه الأثناء هو في المستشفى و سيخضع غداً إن شاء الله لإجراء عملية جراحية، أتمنى له الشفاء العاجل و العودة السريعة إلى بيته و عائلته باسم الله بديت وعلى النبي صليت وعلى الصحابة رضيت وعيّطت يا خالقي يا مغيث كل مغيث يا رب السماء العالي: خرجت نهار الجمعة، في يدي شمعة، قالولي أمسحي ذيك الدمعة، و انساي الخلعة، قريب يتلموا احبابك و صحابك و يفرحوا معاك الجماعة . إن شاء الله يرجع عمي بصحة و سلامة يا رب للبيت و تتلم من حوله كل العائلة من جديد و نفرحو كلنا بيه و معاه الآن أنا في انتظار مشاركاتكم |
ربي يشافيه عمك ويعود ليكم بالسلامة
وتتلمو وتفرحو كامل مع بعض ويعود
في صحة جيدة أحسن من الأول
اقتباس |
وعليكم السلام ورحمة الله تعالى وبركاته
ربي يشافيه عمك ويعود ليكم بالسلامة وتتلمو وتفرحو كامل مع بعض ويعود في صحة جيدة أحسن من الأول |
و يشفي كل عليل
الله يخليك هديدو
و هاذي بوقالة نويتها عليك
زينة الشعور و كحلة العيون …نديها لوكان نخسر عليها 30 مليون
اقتباس |
آمين يا رب العالمين
و يشفي كل عليل الله يخليك هديدو
زينة الشعور و كحلة العيون …نديها لوكان نخسر عليها 30 مليون
أتمنى أنها تعجبك
|
ويرجع لعايلة وولاد
بصحة وعافية
اهاكي هاد البوقالات
1: الناس تنده بالرجال والوالي. وانا ننده بربي العالي
2: حوم حوم ياحوام. حوم فوق السطح العالي .وقول لها يالالة يازينة لبنات وخخدودهابراقة. وعيونها غراقة. صارت كل القلوب ليها سباقة .
3: كلام على كلام. والكلام على السقيلة. العين في العين والدعوة مقبولة
4: محبس منقوش .مربي على الغشوش. مايحمل الاهانة .اصبر ياخاطري حتى يفرج مولانا
5: لزيت لباب الرياض .الورد على الباب .النرجس باسني .الزهر عنقني .والياسمسن مابغ يكلمني
6: قطعت اللحم بيدي وعملت بذور .وسمعت الكلام بوذني وعرفت من قالوا . ياقايلين الكلام القبيح واش تربحوا. انا طاوس في القمر وانتم خفاش النهار مايضوالوا
7: جزت على جنية قالتلي واش تجوسي يالولية .قلتلها ماني نحوس لا على مال ولا على جاه . راني نحوس على من ضيعت يولي ليا
8: امنت بالله . والمنام رؤية من عند الله .حمامة بيضة جات ترفرف عليا .معاها حصان توقف بين يديا
9: نبعث لكم دموعي في مشوار زرق. ونبعث كلامي في برية تحرق. ماننسكم ياناس الحق مكة وبلاطها لزرق
10: سمعت قر لحمام في قاع السجنة .لامن سقاه الماء ولامن عطاه شعير ياقمر…لحمام يعيا ويحن.وتتعمر النافورة ونعودوا لزمانا كيما كنا
11: خرجت ليلة الجمعة. في يدي شمعة . خرج لي ملاك حنين قالي. يابنت السحاب حاجتك راه مقضية قلتلو ياسيدي طالت المدة .قالي :روحي لدارك تصيبيها قدامك
12: خرجت بدر البدور تتزعبل في المور .طلقت هادوك الشعور على الخد الي ينور مثل التفاح
13: هبطت لقاع البحر .فرشت زربية .خرجتلي جنية .قالتلي واش بيك يابنية؟.قلتلها راحوا حبابي وخلاوني وحدانية.
14: لوكان السعود تنغرس بالعود نغرس ميات عود في وطية .لكن السعود بيدك يامعبود ياسقام لسعود .سقملي سعدي.
15: طلعت للغابة .صبت الضرو يابس . قلتلوا يا ضرو القمر يمشي ولا حابس .قالي مفرش زربية وحداه طاوس
16: رشيت عتبة الباب بالزهر والطيب .وسقيت كل الاحباب بالعسل والزبيب. وكي نسيت جاني جواب كنت نستناه من عند لبعيد
17: هبطت لقاع البير وفرشت زربية .حرقست حرقوس دهب من راسي لودنية .افرحي يا يما سعدي ولا ليا …نستشفا في عدوين الي ستشفا فيا
18: يما يما ديريلي تويقة في وسط لحديقة باش نشوف زهري كي تجيبو ديك لوريقة
19: ديديو..ديدو..اناسعدي مليح.قنديلي ضاوي .البنيان لي بنيتو قاع سجالي. بنياني فوق غرفة ولي يخصني يكملهولي العالي
20: عسل ياعسل في باقة خضرا. ياشميمت العاشقين ياقمرا .خللق سيد الملاح مايراس امر غير ادا جات غزالتو باش تكمل الحضرة
21: الدالية دلات.. وتدل العنقود .خلى العنقود ينكشف. واسحاب يدوب وخلى لالات النسا تنال المرغوب
22: خرجت نهار الجمعة .في يدي شمعة قالولي امسحي ديك الدمعة .وانساي الخلعة. قريب يتلمو لحباب ولصحاب . ويفرحوا معاك الجماعة
بوقالات هايلة مشكووووورة يا سمية
و انا نعطيكم آخر عيطت لعمي عماني عيطت لخالي خلاني عيطت لخويا اقطع لبحور و جاني مر سيييييييييييييييييييييييي و باي
1:زينت لشعور كحلة لعيون نديها لوكان نخسر 30 مليون
2:فاطمة يا فطوم يالي غارسة لحبق والدوم.كون جاء مرضي من عند الله نكتب ونداوي وكي جاء من الحب راني كاوي
3:بنت السلطان عليها 3خطابة الاول فارس من الفرسن والثاني كشف الاحلام والثالث نتمنى نرجع ليه فيوم من الايام
4:سيدي طالب دير قيا مزية جيبلي هداك الشباب لي ما بغاش يخزر فيا وانا شابة وانا شابة وزهري دارها بيا
5:جاز على باب دارنا واحد الشاب عينو كحلة وعلى خدو خانة وخانة هندية قالتلو باحبيبي يا تجيني يا نجيك يا تستحي على عرضك شويا
6:زوج حمامات سعد لي كلاهم وسعد لي شربهم وسعد لي لقط دعوة الخير منهم
7:من صاب دارنا بلا بيبان ومن صاب دارنا بلا تيقان نحكي انا وحبيبتي لي كان
8:العازب طالع يفطر والازبة طالعة تنشر العين في العين والقلب تكسر
9:رحت نشري الفلفلة والكمون صبت راجل مدلول قالي الحقي حبيبك راه عليك كالمهبول
10:قاعدين تحت الزيتونة شافونا الناس حسدونا
11:خاتم دهب ماتقبلش الاهانة شكون صبر على حبيبو كيما صبرة انا
12:انا هي الخمرية وانا هي اللي يحوسو بيا
من بعد نزيدك البوقالاة و قوليلي ايلا عجبوك ولا لا
13: مالك يامالك ماينفع غير الصح ومولات النية هي ليتربح
14:لالة يامنوالي ياعرجون الدوالي سبع ايام وسبع ليالي ماذقت النعمة وماتحلالي وماعرفت لامن العشق ولامن هبالي
15:نديك نديك لوكان دمي يسيل قدام المليك
16:رقدت الناس وكسرت الكاس وماننساك ياولد الناس
17:حبيبي زين والحاجب فوق العين
18:رحت انعوم صبت الكتابة ارجعت لدار صبت الخطابة
19:يالي طالعين للجبل ادوني معاكم ماشي في خاطركم في خاطر الزين لي معاكم
20:نبغيك قد العسل وحلاه. قد اذهب وغلاه.وقد السماء علاه.
21:مانديه طويل سلوم راشي. مانديه فكرون ماشي. نديه مربوع الخد وسبع بين الغاشي
22:جايز على تاقتها ويقول من صابني حبق في غرفتها ومن صابني جوهرة في رقبتها ومن صابني زوج حلالي نحدثها
23:عيشوش يا عيشوش واش بيك مذبالة اذابيك على الزين واشطارتو راني نشكر فيك واذا بيك على الزواج راني نستنا فيك
25:ناضت الكرمة في وسط الدار خرجو عروقها زنجار بويا يا بويا كي ندير على حب ولد الجار . العين في العين والقب شاعلة فيه النار
26:يامولات السرول التلمساني والله ماننساك وما تروحي من بالي
27:قلبي معمر ودموعي سايلة وانت حبيبي مرة تغيب ومرة تشرف شكيتك للعالي ويكتبك تكون حلالي
28:زرعت عند باب دارنا الفضة نبتتلي سبولة وانا حبيت بقلبي حب سالولي على بنتكم بنت الحسب والنسب والمزودة بالفضة والذهب
29:شوفيا ونشوف فيك نرفد كابتي ونجي ليك
30:عودي يا عودي مانبغك مانشريك نديك حدايا وانا زاهي بيك
حظك في البوقالات .
السلام عليكم
اختار رقم من 1 الي 35
خلاص خيرتوا؟؟؟؟؟؟؟؟
اكيد
**
//
//
//
//
//
//
//
//
01 حليت باب الجنان لقيت الملاح رقود تنهدت الدالية و تحرك العنقود قال القمر فالسماء نكشف على السحاب يذوب خلي الحبيب لحبيبو و اللي في قلبو حاجة الله يبلغ المقصود .
02 نزلت لقاع البحر خرجت لي جنية قالت لي وشبيك يا لالا مهمومة تكلمي افتحي قلبك ليا قلت لها يا مولاتي هذاك حبيبي أداوه عليا قلبي معاه و قلبو معاها هيا
03 يا لي جايا من العين و بيدك مليتي السلة سبحان من أعطاك أزين و زاد في بهاك ذيك الحلة .
04 النور يا النور و النور عينيا طبطبوا على الباب و جابو لي اللي عزيز عليا راني نتمنى من ربي يجي يطلب يدي من ماليا .
05 جاز عليا شباب في يده منديل ازرق و ششيته معنقرة و لبسته تبرق عليه نسمح في الولد و عليه نطلق وعليه نخلي البلاد ونردها خندق .
06 الشمعة يا لشمعة يا لشمعة الضواية لو كان نعرف وشبيك نمسح هذيك الدمعة من خديك و نرد وجهك مرايا يا ربي يا معبود اقبل دعاية يا رجع لي زهو الزمان ويعيا الحبيب قاعد معايا .
07 اطلعت للسطح و فرشت زربية حرقت حر قوس الذهب و حرقست عينيا أفرحي يا يما سعدي ولا ليا نستشفي فالعدو كما استشفى فيا
08 لو كان السعود ينغرسو نغرس ميات عود و عود في طية وحدي لكن السعود في يدك يا معبود يا سقام السعود سقم لي سعدي الناس الكل بحبيبهم وأنا غريب في هذا الدنيا وحدي .
09 فاطمة يا فطوم وين ما تكوني نرسلك مرسول إذا سكنتي البحر نرسلك عوامة وإذا سكنتي السماء نرسلك حمامة و إذا سكنتي القبر يحاسبك مولانا .
10 علاش يا لالا التخمام رحمة الله واسعة و كبيرة لو كان جات بالكلام نتحدثو و نعطوك تدبيرة بصح كل شي بالمكتوب ويعيا و الخير يبان و تزول عليك الهموم و تروح الحيرة .
11 أعلميني يا لالا نهار تروحي لحمامك نرفدلك السلة و نمشي قدامك ندور على يمينك و نزيد على شمالك و نبقى لك خديم و طايع على طول زمانك .
12 السفينة اللي جات باش نلاقيها باللوز و السكر نرش سواريها و الورد والياسمين نهديه للركاب فيها و بالمسك و العنبر نعطر أماليها .
13 يا لشمس الضوايا يا العالية في سماك لو كان صبتك مرايا و نشوف وجهي بضواك يعود ربحي و غنايا و يقسم سعدي ذاك
14 في الساقية الماء يجري و الحشيش نابت متخالف بالشوك مليت حجري من هذاك الراي التالف كي غبت و غاب زهري و لا اللي يجيني خايف .
15 أقعدت تحت النخلة قالولي دقلة نور جات أدور أطلعت فوق النخلة و بالعسل رشيت الصور معاه المعيشة تحلى حبيبي الساكن في القصور .
16 جيت ساميت البحر شفت الحوت يعوم عرفت ما عندي زهر في ذا الحظ المحموم كي غاب ضي القمر ما ردت ضي النجوم .
17 شجرة ياسمين نايضة في وسط الغرفة عروقها سكنجبير و أغصانها قرفة والله ما ننساك يا زينة الوقفة
18 ما نكلش القارص لو يشهيني و ما نخذش الشيخ لو كان يغنيني ناخذ شاب صغير قده يواتيني .
19 دارنا في الجبل مقبلة مكة و فراشها حرير طبقة على طبقة و مصباح الفضة يشعل ما يطفى .
20 غرست ياسمينه في وسط الدار عروقها سكنجبير و أطرافها نوار يما يا يما محلى عشق الجار العين تخز في العين و القلب شاعلة فيه النار .
21 أصلك أصلك و ما ينفع غير الصح مولاة النية الصافية عليها ربي يفتح أطول و لا تقصر يجيها السعد و الربح
22 يا مولاة القلب الكبير ربي يعطيك و يوسع عليك ما عندك لا ذهب و لا حرير و أنت دايما زاهية و ربي مسهلك ما دريت من حيلة ندير باش نكون مثلك .
23 التمر و الحليب في طبق وسط الخيمة نهديهم للحبيب باه يوالف ديمة ما يعزش اللي في الجيب هذاك زوجي يالميمة .
24 يا لتفاح الجربى يا مكر بع محلاك نهديك أنا لحبيبي و بيه نرفع اشناك كي حن عليا ربي أرافقو أنا وياك .
25 يا لساكنة في الخيمة و الريح جاني قبلي ردي أوراقك ديمة لا يولي الريح غربي .
26 في الدار صندوق مخبي في وسطو ذهب و جوهر مرجان و روبا قظيفة قالولي اماليا لمن مخبيه قلتلهم لهذيك مولاة الشان مولاة المشية الظريفة .
27 يا لالا يا لالا يا مولاة القلب القاسي حني على حبيبك يالي طيرتي مني نعاسي ملي شفتك راني نتعذب عليك نعادي اماليا و قاع أحبابي وناسي
28 حكمت الطير بتكة الحرير و ما ظنيته يطير من بعد ما والف خلى قفصي و عمر قفص الغير و اقعدت أنا في البحور نتمشى تالف لا سواري لا قلاع لا وجدت مقاذف هذ الزمان يعطي و يخالف .
29 علي يا علي يالي سومك غالي من صابك تجي لعندي نفرشلك مطرح حرير و نغطيك بيزاري .
30 عيطت على سيد الملاح صبت الناس رقود هزيت الدالية طاح منها عنقود النجوم قالت النجوم نحكي و قال القمر نذوب اصبر يا قلبي ياك كل شي مكتوب .
31 يا للي ملكتنني بزينك يالزايدة في عذابي في الليل نومك و في النهار نترجاك قوليلي غير كليمة يرحم اللي رباك .
32 و ين الطريق اللي فيها محبوبي جيبولي التراب من ثمة نشريه نعمله جعيبة في مكتوبي و إذا مرضو عينيا نكحل بيه حبيبي ما يسمح فيا و أنا ما نسمح فيه .
33 ذاك الحمام اللي محبوس في السجنة يعيا و يفرج ربي و نرجعوا خير من اللي كنا
34 يا قاعدة في الجنينة و القرقاف حذاك في النهار نتفكرك و في الليل نترجاك قلبي وصل لعندك و عينيا حشمو من بهاك ذاك البصر المفلق يما واش فيه راه القلب تعلق لمن نهديه لا طيور تزقزق لا مخبيه .
35 شجرة على طرف البير و أعراقها دلايا يما شفت الطير وجهوا كي المرايا عليه لعقاد تسير و عليه نطوي الثنايا
كل واحد يحط واش جاه في رقموا
اتمنى ان ينال اعجابكم
انا في رقمي جاني هدا :
15 أقعدت تحت النخلة قالولي دقلة نور جات أدور أطلعت فوق النخلة و بالعسل رشيت الصور معاه المعيشة تحلى حبيبي الساكن في القصور .
راني نشوف بلي معجبوكمش هادوا البوقالات؟؟؟؟؟؟؟؟؟؟؟؟؟؟؟؟؟؟؟؟؟
بهيييييييييييييييييييييييييييييييييييييييييييييييي ييييييييييييين
شكرا على مرورك اختي نورتي الصفحة
انا معنديش الزهر من بكري وزيد خرجلي:
16"-جيت ساميت البحر شفت الحوت يعوم عرفت ما عندي زهر في ذا الحظ المحموم كي غاب ضي القمر ما ردت ضي النجوم" .
ربي ورحمتو
انا طلبت الرقم 4 جاتني هذي شابة بزاف :04 النور يا النور و النور عينيا طبطبوا على الباب و جابو لي اللي عزيز عليا راني نتمنى من ربي يجي يطلب يدي من ماليا .
33 ذاك الحمام اللي محبوس في السجنة يعيا و يفرج ربي و نرجعوا خير من اللي كنا
يا لي جايا من العين و بيدك مليتي السلة سبحان من أعطاك أزين و زاد في بهاك ذيك الحلة .
انا اليوم اسعد انسان في الدنيا
شكرا على الموضوع
النور يا النور و النور عينيا طبطبوا على الباب و جابو لي اللي عزيز عليا راني نتمنى من ربي يجي يطلب يدي من ماليا .
