مدرسة مكبرت يحي تيسمسيلت

أمكبرت موحال تشبه اللخريـــــــــن ذا المدرسة ما تنافسها وحـــــــــــــــــــدة.
مدفونة في الدرب مستورة عالعيــن فوق الموتى تبان حية مرفـــــــــــــــــودة.
مقبرة م الفوق لخرى ع اليميــــــــن وسط الموتى ضاربة فيها رقــــــــــــــــدة.
من الداخل تقول مطلية بالطـــــــــين قبة خضرا تقول ذا سيدي عـــــــــــــــــدة.
لا بيبان و لا تواقي مصنوعيـــــــــن حتى البورطاي ثان باقي غي فـــــــــــردة.
الدالة والحيطان كامل مشقوقـــــــين خايف كاش نهار تدينا رعــــــــــــــــــــدة.
نقري في الظلمة الوانب محروقـــين والخيط الي كان شاعل زاد قــــــــــــــــدى.
وسط الظلمة نهمسو كالمكفوفيــــــن وكي نكتب الحرف نحسبـــــــــــــــو دودة.
ونفلفس على الخزانة راحت ويــــــــن وسط القسم نحس روحـــــــــي في هودة.
لا تدفئة لا كلايس سخونيــــــــــــــــن و البوالات حديدهم راهو صــــــــــــــدى.
جابوهم بالميز في عام التسعيـــــــــن وحتى رقة مابقاتش جديـــــــــــــــــــــدة.
والقاز هنا والذراري محرومـــــــــين وغي يدخل البرد تزراق الجلــــــــــــــدة.
وذرارينا قاع عادو منهوجيــــــــــــن حس الكحة في الشتا ولى مــــــــــــــودا.
عدنا نكرهوه هذا الفصل الشـــــــيــــن مازينك ياصيف في هذا الشـــــــــــــــدة.
وذرارينا ثان ماهمش شواطيــــــــــن الجال مع الجين معاه الحــــــــــــــــردة.
الحردة والجال وسراويل الجيــــــــــــن وغي تهدر معاه يجبد حديــــــــــــــــدة.
وامحمد مديرها كاره وحزيــــــــــــــن واش يسقم كلشي ولى خــــــــــــــــردة.
الف برية دارها للمسؤوليــــــــــــــــن ولله واحد ماحنانتلو كبــــــــــــــــــــــدة.
وبقى حاير مالقى حتى معيــــــــــــــــن في بالي شرية قديمة مقصــــــــــــــودة.
مدرستنا قاع ماهي كي لخريــــــــــــــن وجميع اللي يجيك يغصب للهــــــــــــدة.