بوقالات جديدة ، أعقد و أنوي

01 – حليت باب الجنان لقيت الملاح رقود تنهندت الدالية و تحرك العنقود قال القمر فالسماء نكشف على السحاب يذوب خلي لحبيب لحبيبو و اللي في قلبو حاجة ربي يبلغ المقصود .
02 – نزلت لقاع البحر خرجت لي جنية قاتلي واش بيك يا لالة مهمومة تكلمي أفتحي قلبك ليا قلتلها يا مولاتي هذاك حبيبي أداوه عليا قلبي معاه و قلبو معاها هيا .
03 – يالي جايا من العين و بيدك مليتي السلة سبحان من أعطاك الزين و زاد في بهاك ذيك الحلة .
04 – النور يا النور و النور عينيا طبطبو على الباب و جابولي اللي عزيز عليا راني نتمنى من ربي يجي يطلب يدي من ماليا .
05 – جاز عليا شباب في يده منديل أزرق و ششيته معنقرة و لبسته تبرق عليه نسمح فالولد و عليه نطلق و عليه نخلي البلاد و نردها خندق .
06 – الشمعة يا الشمعة يا الشمعة الضواية لو كان نعرف واش بيك نمسح هذيك الدمعة من خديك و نرد وجهك مرايا يا ربي يا معبود أقبل دعايا يرجع ليا زهو الزمان و يعيا لحبيب قاعد معايا .
07 – طلعت للسطح و فرشت زربية حرقست حرقوس الذهب و حرقست عينيا أفرحي يا يما سعدي ولا ليا نستشفي فالعدو كيما استشفى فيا .
08 – لوكان السعود ينغرسو نغرس ميات عود و عود في طية وحدي لكن السعود في يدك يا معبود يا سقام السعود سقم لي سعدي الناس الكل بحبيبهم و أنا غريب في هاذ الدنيا .
09 – فاطمة يا فطوم وين ما تكوني نرسلك مرسول إذا سكنتي البحر نرسلك عوامة و إذا سكنتي السماء نرسلك حمامة و إذا سكنتي لقبر يحاسبك مولانا .
10 – علاش يا لالة التخمام رحمة الله واسعة و كبيرة لوكان جات بالكلام نتحدثو و نعطوك تدبيرة بصح كل شيء بالمكتوب يعيا و الخير يبان و تزول عليك الهموم و تروح الحيرة.
11- أعلميني يا لالة نهار تروحي لحمامك نرفدلك السلة و نمشي قدامك ندور عل يمينك و نزيد على شمالك و نبقا لك خديم و طايع على طول زمانك .
12 – السفينة اللي جات باش نلاقيها باللوز و السكر نرش سواريها بالورد و الياسمين نهديه للركاب فيها و المسك و العنبر نعطر ماليها .
13 – يا الشمس الضواية يا العالية في سماك لوكان صبتك مرايا و نشوف وجهي بضواك يعود ربحي و غنايا و يقسم سعذي ذاك.
14 – في السقية الماء يجري و الحشيش نابت متخالف بالشوك ، مليت حجري من هذاك الراي التالف كي غبت و غاب زهري ولا اللي يجيني خايف .
15 – أقعد تحت النخلة قالولي دقلة نور جات دور ، طلعت فوق النخلة و بالعسل رشيت الصور معاه لمعيشة تحلى حبيبي الساكن فاقصور .
16 – ذاك لحمام اللي محبوس في السجنة يعيا و يفرج ربي و نعرجعوا خير من اللي كان .
17 – يا اللي قاعدة في الجنينة و القرقاف حذاك في النهار نتفكر و فالليل نترجاك قلبي وصل عندك عينيا حشمو من بهاك ذاك البصر المفلق يما واش فيه راه القلب تعلق لمن نهديه لا طيور تزقزق و لا حبيب نغنيه .
18 – شجرة على طرف البير و أعراقها دلاية يما شفت الطير وجهو كي المرايا عليه لعقاد تسير و عليه نطوي الثنايا .
19 – فالدار صندوق مخبي في وسطو ذهب و جوهر و مرجان و روبا قطيفة قالولي ماليا لمن مخبيه قلتلهم لهذيك مولاة الشان مولاة المشية الظريفة .
20 – يا لالة يا لالة يا مولاة القلب القاسي حني على حبيبك يا اللي طيرطي مني نعاسي ملي شفتك راني نتعذب ،، عليك نعادي ماليا و قاع حبابي و ناسي .

و اللي نوا و قرا يقولي واش طاح في زهرو .