الانترنت و كيف قلبت موازين حياتك

مرت الايام و الشهور .. مرشد مل من الالعاب.. كعادته يمل من كل شي و اي شي بسرعة … يسمع من الناس .. انتر نت انتر نت … شو هذا؟؟… مادري .. خلينا نسير الانترنت كافيه في شارع الضيافة و نشوف ..
سرت .. و مثل الغبي.. ماعرف شو اسوي .. ماعرف كيف اشغل المتصفح .. اشوف اشياء .. انادي .. النادل.. ياعيني على النادل.. لو سمحت شو اسوي؟؟؟ النادل في استغراب .. ينظر الي نظرة استحقار بما معناه .. شو تسوي هني؟؟ ليش ييت لو ماتعرف… انا عرفت معناها من عيونه الشلقى .. و شغلي المتصفح الي كان نتسكيب .. و راح .. انزين شو اسوي الحين؟؟؟؟ وين اروح؟؟ .. اسمع الناس يقولون شاتنج و شاتنج ..شو عاد ووين ؟؟ .. مادري..ز اشوف واحد هندي يالس صوبي .. هو الحبيبي.. كان يشيت … من تصرفاتي الغبية عرف اني ابغي ادخل على شي يفرفش.. كتبلي .. دبليو دبليو دبليو .. دوت .. شاتنج … دوت كوم … مرشد مستانس .. دخل الشات … و الكل انجليزي.. الله ,, يقرا اشياء دنيئة .. غريبة .. شو هذا … يالله .. خلصت الساعة يامرشد.. مرشد يقوم من الطاولة و في باله ان يرجع اليوم الثاني ليستكشف هذا الشي الي دخله ….

اليوم الثاني … مرشد نسا العنوان .. شو كان شو كان؟؟.. ماعرف… بالصدفة .. شاف ربيعه .. سلام عليكم و عليكم السلام .. كيف الحال و شخبارك .. تعال تعال ايلس صوبي.. مرشد يالس ,, و ربيعه يشيت .. وين عاد ..في الاماك … يكتب الحروف الانجليزية و النطق العربي.. اشوف سبعة .. و نقطة و مادري شو .. اقوله شو تكتب؟؟ يقول اصبر اصبر.. و يبتسم … و سضحك .. وانا مثل الاطرش في الزفة … اسمع ان الانترنت خطر.. يمكن هذا يسوي شي خطير.. خلونا نشوف… ايييييواااا ,,, الحبيب مستانس.. هاا خير شو السالفة؟؟
رقمتها… ها!!! الحبيب رقم وحدة في الشات .. مستانس الاخ …والله حاله … هذه فايدة الانترنت يعني؟؟

يوم يومين .. العطلة الصيفية مرشد قضاها في الكافيه .. مايدري وين يسير ..بس المهم يستانس يروح مني مناك .. طبعا مافي مواقع عربية .. الللام راس ماله ياهو و هوت ميل … مايعرف شي ثاني..
يوم بعد يوم .. مرشد قام يتعلم و يتعلم ويتعلم … بس ترك الانترنت …….. مب فاضي للمقهى و سوالفه

هييه هيييه هييه … شو السالفة؟؟… الانترنت دخل البيت… الله شي جميل… الكمبيوتر الي على ايامه كان الافضل في العالم … هاهاها .. اخيرا شبك بالانترنت … لعوزناهم مال اتصالات لين ماضبطوا كل شي..هاهاهاها اخينا مرشد اونه هو العالم بشؤؤن الانترنت .. جدام الاهل.. يسوي عمره الخبير الكبير .. يدخل الشات و يطلع بسرعه .. اونه الموقع ماعيبه .. يدخل ياهو .. يتم دقيقة .. يكتب في محرك البحث اسمه .. و يتريا .. غير رايه .. يدخل هوت ميل.. بس يراوي اهله انه فلتة في الموضوع … الحبايب مايعرفون شو السالفة … و بس …

يوم ورا يوم ورا يوم ورا يوم … نشوف الجرايد و نقرا .. سوالف … اهاا ,, شو هذا …نجرب .. والله موقع حلو .. نسجل.. نشارك ..ننكت .. اوكيك كل بسيرله .. اير و اقرا و اقرا الردود والمواضيع ..بس مارد .. مب فاضي .. اكتب اسمك و الرقم السري و مادري شو …. بعدين بعدين … بس حسيت اني تعلمت شي جديد..
ركبت الايسيكيو الي الكل يتكلم عنه في الشات … ادخل الشات .. هاا شو رقم الايسيكيو مالك .. شو ايسيكيو؟؟.. ماعرف … تعلمت و سرت نزلته في الكمبيوتر ….
يوم ورا يوم ورا يوم… تتعرف على اصدقاء … تعرف تفكيرهم … عقليتهم .. تدرسهم .. نشوف مواقع ..
بس لين الحين ماوصلنا درجة الادمان …

جيتكس .. في دبي… خلالالالالالاص… لازم اشتري كمبيوتر لي وحدي .. لازم في خصوصية في الموضوع .. مرشد سار يسأل شو احسن شي.. شو احس مواصفات … يسمع عن الرام .. و البنتيوم .. شو السالفة مايعرف .. بس يعرف انه اليديد هو بنتيوم 3 500 … و الرام مادري كم … في المعرض .. اخينا مرشد يتمشا .. و يسأل .. هااا شو في من مواصفات .. الريال يقول الي حافظنه بسرعة .. و انا يالله يالله القط … و على ويهي علامة الفهم وانه شي عادي و المواصفات سخيفة .. و في الصوب الثاني ماعرف عن شو يتكلم اصلا .. اروح من هذا و اسير لغيره … لين مارسيت على محل في اخر يوم .. قلت خلاص .. نتوكل على الله .. .. اشتريت .. وياليتني ماشتريت .. نصيحة ياخوان … لاتاخذون من غير الوكيل مهما كان فرق السعر …. بس الخراب الي كان يحصله فادني..
كنت اروح للمحل و ايلس فوق روسهم و اخليهم يتركون شغلهم و يصلحون جهازي و انا ما اروح .. ايلس اطالع شو يسوي… و اتعلم .. و اتعلم …….

مرشد حب يدخل في عالم الهاكرز… هاهاهاها .. دخل .. وجرب و دخل كمبيترات .. و طالع .. و مل.. ماخربت شي .. و لا خذيت شي ,,,, شفت السالفة ماتسوى .. مضيعة وقت و كلام فاضي .. و حرام ادخل و اشوف اشيا مالي خص فيها …تركت الموضوع …
الانترنت اكبر من هذا الشي .. فتحوا سوالف سوفت .. كنت اول المشاركين .. قررت اني افيد و استفيد …
الصراحة من عقب سوالف سوفت … زادت يلساتي على النت … صرت مدمن .. افتح المتصفح على سوفت .. و افتح اكثر من واحد لاقسام مختلفة . و افتح واحد لاشياء ثانية و مواقع ثانية … اتعلمت اشيا كثثيييررة . .. من ناحية الحياة و من ناحية النت … كثرت جلساتي خلف الصندوق العجيب.. قلت طلعاتي… لدرجة ان الكل برع .. و مرشد على الكمبيوتر على النت … و الوقت يمر و يمر و انا ماحس بالموضوع … وصلت عدد الساعات الى ست ساعات متواصلة على الانترنت … عيوني راحت فيها … اففففففف… التغيرات الجسمانية الي حصلت هي
ابيضيت .. هييه .. ابيض لوني .. مع اني مايل للسمار … من كثر مايلس تحت الكنديشن ,,,
تصدقون اني طولت .. هاهاها نسبة الى المدة ,, يعني قبل كنت اطلع و العب و الحين مالي خص بالرياضة .. بس همي الانترنت …

ارجع من الكلية .. على طول .. افتح الكمبيوتر لين الساعة 10:30 تقريبا .. هذا يومي.. على النت .. الاستراحات تكون وقت الصلاة بس.. 10 دقايق وارجع … هذا جدولي اليومي.. ماعندي شي ثاني
انشهرت بين ربعي … الكل يعرف اني مدمن انترنت ,, يتصلونلي .. هااا وين على الانترنت اكييد .. اقول نعم .. و يطييح فيني حط .. نت ماعندك شي ثاني و انت و انت وانت …هاهاهاه
و الاهل …. يا مرشد مب زين .. من الصبح على الانترنت .. و مادري شو …

باختصار .. بعد ماكتبت قصة حياتي..
الانترنت غيرت مجرى حياتي… قللت الطلعات بشكل رهيب.. حتى اوقات المهرجان … تعلمت اشيا كثيرة تخص الحياة العامة و التكنولوجيا … قريت كتب من الانترنت ,,, تعلمت اشياء كثيرة لا حصر لها .. و اخيرا .. سويت لي موقع شخصي .. منو كان يتصور ان مرشد يسوي موقع شخصي .. هذا الشخص الي كان مايعرف يفتح المتصفح في الكافيه .. يسوي موقع؟؟؟!!!!…غريبة
سبحان مغير الاحوال….

اسف على الاطالة .. كتبت قصة حياتي ادري…هاهاهاه معذرة …

اانتوا .. كيف غير الانترنت موازين حياتكم؟؟؟؟؟؟؟؟؟